آهنگ یوه ورځ از حشمت شریندل + متن آهنگ

یوه ورځ به دا جهان وی نه به ته یې نه زه یم
هم به مځکه هم آسمان وی نه به ته یې نه به زه یم

سیپن لاسونه د ساقی به ګرځوی پیالې د مُلو
سره جمع به یاران وی نه به ته یې نه به زه یم

د پانوس لمبې به سوځی بې فریاده وزرونه
بل محفل نور به رندان وی نه به ته یې نه به زه یم

تور لښکر به د اغیارو څوک په تور د مینې وژنی
بل منصور بل به ایمان وی نه به ته یې نه به زه یم

د باطل نمرود به اور وی د حق چیغې شوروی
څوک خلیل به ور روان وی نه به ته یې نه به زه یم

لا چښی به په خلوت کې غلی غلی شرابونه
ریا کار به زاهدان وی نه به ته یې نه به زه یم

څوک به ناڅی څوک به خاندی څوک به مات وی تر غم لاندې
هم ساحل هم به توپان وی نه به ته یې نه به زه یم

بازاری مینې به پلوری اشارې دبورو سترګو
ګناهکار به عاشقان وی نه به ته یې نه به زه یم

له شهبازه به را اوری “جهانی” ستا غزلونه
ستا دمینې به داستان وی نه به ته یې نه به زه یم